సొంత కుటుంబం నుంచి ట్రంప్​కు పెద్ద షాక్​!

అమెరికా అధ్యక్షుడు డొనాల్డ్​ ట్రంప్​ను ఇబ్బందులకు గురిచేసే విషయం తాజాగా బయటపడింది. 'ప్రపంచంలోనే అత్యంత ప్రమాదకరమైన వ్యక్తి ట్రంప్​' అంటూ అధ్యక్షుడు ట్రంప్​ అన్న కూతురు మేరీ ట్రంప్​ ఓ పుస్తకాన్ని రచించారు. ఇందులో ట్రంప్​పై తీవ్ర స్థాయిలో ఆరోపణలు చేశారు. అధ్యక్షుడిగా మరోమారు ట్రంప్​ను ఎన్నుకుంటే అమెరికన్లు తమను తాము బలి చేసుకున్నట్లేనని తేల్చిచెప్పారు. అయితే ఈ ఆరోపణలను శ్వేతసౌధం కొట్టిపారేసింది.

సంచలనాలకు కేరాఫ్​ అడ్రస్​.. అమెరికా అధ్యక్షుడు డొనాల్డ్​ ట్రంప్​. తన వివాదాస్పద నిర్ణయాలు, ట్వీట్లతో నిత్యం వార్తల్లో ఉంటారు ట్రంప్​. అధ్యక్షుడిని విమర్శించే వారూ చాలా మందే ఉన్నారు. తాజాగా ఈ జాబితాలోకి అధ్యక్షుడి అన్న కూతురు మేరీ ట్రంప్​ చేరారు. ట్రంప్​, కుటుంబ వ్యవహరాలను ప్రస్తావిస్తూ ఓ పుస్తకాన్ని రాశారు సైకాలజిస్ట్​ మేరీ. దీనికి సంబంధించిన కాపీ అమెరికాలోని ఓ ప్రముఖ వార్తా సంస్థకు అందింది. ఇంకొన్ని నెలల్లో అధ్యక్ష ఎన్నికలు జరగనున్న నేపథ్యంలో.. "ప్రపంచంలోనే అత్యంత ప్రమాదకరమైన వ్యక్తి ట్రంప్​" అంటూ మేరీ చేసిన ఆరోపణలు ఇప్పుడు హాట్​ టాపిక్​గా మారాయి.

'రెండోసారి గెలిపిస్తే అంతే'

తాను రాసిన "టూ మచ్​ అండ్​ నెవర్​ ఎనఫ్​.. హౌ మై ఫ్యామిలీ క్రియేటెడ్​ ది వరల్డ్స్​ మోస్ట్​ డేంజరస్​ మ్యాన్​" అనే పుస్తకంలో తీవ్ర ఆరోపణలు చేశారు మేరీ ట్రంప్​. 'అబద్ధాలు చెప్పడం, మోసం చేయడం, ఇతరుల్లో విభజన భావాలను సృష్టించడం డొనాల్డ్​ ట్రంప్​కు వెన్నెతో పెట్టిన విద్య' అంటూ తీవ్ర స్థాయిలో విమర్శలు చేశారు.

"ఈ పుస్తకాన్ని ప్రచురించే నాటికి.. ట్రంప్​ గర్వం, అజ్ఞానం వల్ల వేలాది మంది అమెరికన్ల జీవితాలు నాశనం అయిపోయి ఉంటాయి. అధ్యక్షుడిగా ట్రంప్​ను రెండోసారి గెలిపిస్తే.. అమెరికాలో ప్రజాస్వామ్యానికి తెరపడినట్టే."

--- మేరీ ట్రంప్​, ట్రంప్​ అన్న కూతురు.

'ట్రంప్​ శాట్స్​ రాయలేదు..'

పెద్ద వ్యాపారవేత్త నుంచి అమెరికా అధ్యక్షుడి స్థాయికి ఎదిగిన ట్రంప్​.. తన జీవితంలో ఎన్నో మోసాలు చేశారని ఆరోపించారు మేరీ​. కళాశాలల్లో ప్రవేశం కోసం నిర్వహించే శాట్స్​ పరీక్షను ట్రంప్​ రాయలేదని తెలిపారు. ట్రంప్​ తన స్నేహితుడితో పరీక్షలు రాయించారని.. ఆ తర్వాత అతడికి భారీ మొత్తంలో సొమ్ములు చెల్లించారని ఆరోపించారు. పుట్టుకతోనే ధనికుడైన ట్రంప్​కు డబ్బుల కొరత లేదన్నారు.

" అతడి సోదరి మేరీయాన్​తో హోంవర్కులు రాయించేవారు ట్రంప్​. తన మార్కులు దెబ్బతింటాయేమోనని భయపడేవారు. అప్పటికే ఆయన గ్రేడ్లు సరిగ్గాలేవు. అందువల్ల పరీక్షల్లో గట్టెక్కడానికి జో షాపిరో అనే ప్రతిభావంతుడి చేత తన శాట్స్​ పరీక్షలు రాయించారు ట్రంప్​. నిధులకు కొరత లేని ట్రంప్​.. అతడికి భారీ మొత్తంలో సొమ్ములు చెల్లించారు. "

--- మేరీ ట్రంప్​.

ట్రంప్​ ఎవరిని లెక్కచేయరని.. తన కుటుంబసభ్యుల మనోభావాలను కూడా పట్టించుకోరని మేరీ మండిపడ్డారు. మహిళలపై ట్రంప్​ వివక్షపూరిత వ్యాఖ్యలు చేయడం తన చిన్నతనంలో అనేకమార్లు చూశానని రాసుకొచ్చారు.

ట్రంప్​ అన్న ఫ్రెడ్​ జూనియర్​ కూతురే మేరీ. మద్యానికి బానిసైన ఫ్రెడ్​.. 1981లో 42ఏళ్ల వయస్సులో మృతిచెందారు. అప్పటికి మేరీ వయస్సు 16ఏళ్లు. తన తండ్రి మృతిచెందిన సమయంలోనూ ట్రంప్​ సినిమాలకు వెళ్లారని పేర్కొన్నారు.

అయితే ఫ్రెడ్​కు పైలట్​ అవ్వాలని ఉండేదని.. కానీ కుటుంబ వ్యాపారాల్లో చేరాలని తాము ఒత్తిడి తెచ్చినట్టు గతేడాది ట్రంప్​ వెల్లడించారు. ఈ పూర్తి వ్యవహారంపై చింతిస్తున్నట్టు తెలిపారు. ఇలా ట్రంప్​ తన తప్పును అంగీకరించడం చాలా అరుదు.

'అవన్ని అబద్ధాలు...'

మేరీ రాసిన పుస్తకంపై శ్వేతసౌధం స్పందించింది. ఆ పుస్తంలో ఉన్నవి అన్ని అబద్ధాలేనని తెలిపింది. అందులో చేసిన ఆరోపణలన్నీ అసంబద్ధమైనవని పేర్కొంది.

పుస్తకంపై వివాదం...

మేరీ ట్రంప్​ రాసిన పుస్తకంపై కోర్టు కేసు నడిచింది. తమ కుటుంబ సభ్యుల్లోని ముఖ్యమైన వారికి సంబంధించి ఎలాంటి విషయాలు, ఎక్కడా రాయకూడదని 20ఏళ్ల క్రితం ఓ ఒప్పందం కుదుర్చుకున్నామని.. ఈ ఒప్పందాన్ని మేరీ ఉల్లంఘించారని అధ్యక్షుడి తమ్ముడు రాబర్ట్​ ట్రంప్​ కేసు వేశారు. అయితే చివరికి పుస్తకాన్ని ప్రచురించాలని తీర్పునిచ్చింది న్యూయార్క్​ కోర్టు.

ఇన్ని వివాదాస్పద అంశాలున్న ఈ పుస్తకం ఈ నెల 14న విడుదల కానుంది. సిమాన్​ అండ్​ షుస్టర్​ సంస్థ దీనిని ప్రచురించనుంది.